ВИДЕО | Маркова: Ако ги сечеме шумите ќе нема пчели, а ќе нема ни мед
Овој викенд граѓаните имаат можност да дегустираат мед и пчелни производи на Петтиот саем на мед на плоштадот „Македонија“ во центарот на Скопје.
Учествуваат пчелари и производители на пчелни производи од цела држава, кои ќе им понудат на потрошувачите, да дегустираат и да го разликуваат вистинскиот од лажниот мед, а потоа да речат дали и што ќе купат.
Прилепчанецот Христијан Аврамоски 20 години се занимава со пчеларство. Пред камерата на „Слободен печат“ ги открива тајните и моќта на овој производ.
-Видов дека е убаво да се живее со пчели, од 2002 почнав да купувам кошници. Во моментов имам над 350 сандаци кои ги селам низ цела Македонија- вели Аврамоски.
Шумскиот мед станува раритет на пазарот, вели пчеларката, Рената Маркова. Неконтролираната сеча, пожарите и уништувањето на шумските предели низ земјава се главни фактори за тоа да се намалува производството на мед.
– Можам да ви го препорачам шумскиот мед иако секоја година е се послабо производството на овој мед бидејќи шумите постојано се сечат, а пчелите немаат што да донесат. Ние луѓето ја уништуваме природата, а ако ја уништиме природата ќе нема ни пчели- вели Маркова.
Ги прашавме и случајните минувачи дали во нивната редовна исхрана е вклучен и медот. Како најчесто го консумираат и дали веруваат во тоа дека на нашиот пазар има квалитетн мед? Организатор е ПФМ (Пчеларска федерација на Македонија). Саемот ќе биде отворен до недела од 9 до 18 часот.
Целото видео на колешката Александра Вуксановиќ можете да го погледнете тука: