Денеска од 15.30 часот на стадионот „Мардан“ во Анталија, Турција, македонската фудбалска А репрезентација ќе го одигра првиот од двата закажани пријателски натпревари овој месец.

Прв ривал на избраниците на селекторот Благоја Милевски е селекцијата на Молдавија, а три дена подоцна се среќаваат против Црна Гора.

Милевски најави дека овие мечеви ќе се искористат за нови тактички варијанти, а некои играчи ќе бидат поставени на нови позиции и ќе се види како сето тоа ќе изгледа.

Македонија до сега три пати играше против Молдавија, и во сите дуели немаше победник. Два пати се сретнавме во кваликациите за Светското првенство 2002 година, на 11 октомври 2000 на гости во Кишинев немаше голови (0:0), а на возвратниот дуел во Скопје на 2 јуни 2001 резултатот беше 2:2.

Последниот натпревар меѓу овие две репрезентации се сретнаа на 11 февруари 2009 година во пријателски меч токму на стадионот „Мардан“ во Анталија кога ремизираа 1:1. Нашиот поранешен репрезентативец Горан Пандев тогаш донесе водство во 53 минута, а израмнија противниците во 62 минута преку Валериј Андроник.