ВИДЕО: Кошаркарите на Црвена звезда после драма поразени од Барселона во Евролигата
Кошаркарите на Црвена звезда се поразени на гостувањето кај екипата на Барселона со резултат 86:81 во натпреварот од седмото коло од Евролигата.
Најдобар во тимот на Барселона беше Џабари Паркер со 18 поени и четири скока, додека Вили Ернангомез додаде 18 поени и четири скока.
Во тимот на Црвена звезда се истакна Лука Митровиќ со 22 поени и шест скока.
Барселона во текот на првото полувреме го контролираше резултатот во своја корист, во еден момент од втората четвртина имаше и предност од „плус 17“ (42:25).
Таквата голема предност белградските „црвено-бели“ почнаа со сета сила да ја топат во третата четвртина, и пред стартот на последните 10 минути Барселона водеше со само 65:62.
Црвена звезда стигна и до нерешени 78:78, но кога беше најпотребно попушти концентрацијата во решавачките моменти, Барселона тоа го искористи и на крајот триумфираше со 86:81.
Се одиграа уште два меча во петокот: Алба Берлин – Панатинаикос 85:99, Монако – Лион Вилербан 80:70.