Фудбалерите на Јувентус ја победија Парма со 4:1 на гостински терен вечерва, во натпреварот од 23 коло од италијанската лига.

Клубот од Торино поведе во 15 минута преку Бремер, а во 37 минута Вестон МекКени зголеми на 2:0.

Парма ја намали разликата по автоголот на Андреа Камбијазо во 51 минута, а Јувентус последователно ја потврди победата со головите на Бремер во 54 минута и Џонатан Дејвид во 64 минута.

Јувентус можеше да постигне и петти гол, но голот на Лоис Опенда во втората минута од судиското продолжение беше поништен поради офсајд.

Јувентус е на четвртото место во Серија А со 45 бода, еден бод зад третопласираниот Наполи на македонскиот репрезентативец Елиф Елмас и два зад второпласираниот Милан, кој има натпревар помалку.

Парма, по четвртиот натпревар по ред без победа во првенството, се наоѓа на 16 место со 23 бода. Во следното коло, Јувентус е домаќин на Лацио, додека Парма е на гости кај Болоња.