ВИДЕО I Јосифовски од НУК: Новите мерки ќе значат колапс за угостителите, владата мора да донесе нови
Здравко Јосифовски од Независната угостителска Комора (НУК) денеска во „Утрински брифинг“ информираше дека побарале средба со владини претставници по вчерашната одлука со која угостителските објекти ќе треба да затвораат во 18 часот.
– Ќе бевме среќни ако се прифатеа нашите барања да го задржиме работното време за време на новогодишните празници. Сметаме дека тоа нема да се одрази на бројот на новозаболени од коронавирус. Сепак, ние како Комора во целост ќе ги почитуваме сите мерки што ги донесе Владата по препорака на Комисијата за заразни болести, рече Јосифовски.
Според него, новите мерки не се проследени со соодветна финансиска поддршка.
– Обештетување се бара тогаш кога не може на ниту еден друг начин да се договорите дали тоа што ви следува треба да го добиете. Побаравме денес да се сретнеме со владини претставници и да им посочиме дека е од голема важност да се донесат нов сет на мерки, исклучиво наменет за угостителскиот сектор, селективна мерка каква што е всушност и забраната. Со тоа ќе се овозможи во следниот период, додека се на сила мерките, да опстојат угостителите, нагласи Јосифовски.
Тој потенцира дека новите мерки ќе значат колапс за угостителите.
– Проблемот е во тоа што никој не кажува на кој начин ќе се покријат сите загуби. Угостителите ќе почнат да ги рационализираат нивните трошоци. Или ќе почнат да ги намалуваат платите на вработените или ќе почнат да пратат распореди за работа преку еден ден, предупреди првиот човек на НУК.