Министерството за внатрешни работи на Гватемала објави, како што ја нарече, „историска“ заплена на 4,9 тони кокаин во пристаниште во централноамериканската земја на Тихиот Океан, пренесува Пренса Латина.

Товарот беше откриен за време на операција против дрога во неделата во Пуерто Кецал, 85 километри јужно од главниот град.

Запленета е „најголемата количина“ досега откриена со „една операција“ на властите во земјата, соопшти министерството, опишувајќи го развојот на настаните како историски. Количината ги надминува речиси 4,4 тони што беа запленети во декември 2018 и ноември 2024 година.

Дрогата била скриена во седум контејнери со вреќи брашно. Нејзината вредност се проценува на 85 милиони долари на локалниот пазар, според министерството.

Полицијата појасни дека контејнерите пристигнале во земјата од Костарика.

Меѓународните картели ги користат пристаништата во Централна Америка за шверцување кокаин во Соединетите Американски Држави, најголемиот потрошувач на дрога во светот.

Во 2025 година, гватемалските власти објавија заплени вкупно 9,8 тони кокаин, што е намалување во однос на 18,2 тони пријавени во 2024 година.