ВИДЕО | Гори познат облакодер во Судан
За време на тешките борби меѓу армијата и противничките сили во Судан, избувна пожар во неколку згради. На видеата кои вчера се појавија на социјалните мрежи се гледа како гори познатата кула на нафтената компанија Грејтер Најл Петролеум во Картум.
Облакодерот од 18 ката се наоѓа во близина на реката Нил и е една од најпрепознатливите знаменитости во главниот град на Судан. Засега не е познато што го предизвикало пожарот во кулата со стаклена предна страна. Нема извештаи за повредени или загинати, пишува Би-Би-Си.
Конфликтот во Судан избувна во средината на април кога повеќемесечните тензии меѓу суданскиот армиски генерал Абдел Фатах Бурхан и неговиот ривал, генералот Мохамед Хамдан Дагало, кој командува со паравоените сили на РСФ, избија во отворени борби.
Завојуваните страни, кои се судрија околу плановите за интегрирање на нивните трупи под покровителство на меѓународната заедница како дел од транзицијата кон демократија, негираат одговорност за многу од нападите во кои загинаа цивили.