Eкипата на Оклахома успеа да стави крај на мини серијата лоши резултати и да го избегне третиот пораз во низа, откако ноќеска по драматично продолжение славеше над Јута со 129-125.

Апсолутен херој на натпреварот беше Шеј Гилџес-Александер. Канадската ѕвезда уфрли дури 46 поени и со кош во последната секунда од регуларниот дел го спаси актуелниот НБА шампион од пораз, носејќи му продолжение. Во дополнителните пет минути Тандер покажа повеќе смиреност и квалитет, па го скрши отпорот на Јута и стигна до важна победа.

Иако имаше слаб шут за три поени (1/8), Гилџес-Александер беше исклучително ефикасен од поле (13/18 за два) и речиси безгрешен од линијата за слободни фрлања (17/19). Значаен придонес дадоа и Чет Холмгрен со 23, како и Џејлен Вилијамс со 17 поени.

Кај Јута најрасположен беше Лаури Марканен со 29 поени, меѓу кои и кош за водство од 114-112 на само три секунди до крајот, но тоа не беше доволно за триумф.

Со оваа победа Оклахома останува на врвот во НБА-лигата со скор 31-7, додека Јута е на 13. позиција во Западната конференција со биланс 12-24.

РЕЗУЛТАТИ

Бостон – Денвер 110-114

Шарлот – Торонто 96-97

Детрпот – Чикаго 108-93

Филаелфија – Вашингтон 131-110

Атланта – Њу Орлеанс 117-100

Бруклин – Орландо 103-104

Њујорк – ЛА Клиперс 123-111

Мемфис – Феникс 98-117

Оклахома – Јута 129-125

Сан Антонио – ЛА Лејкерс 107-91

Голден Стејт – Милвоки 120-113

Портланд – Хјустон 103-102