ВИДЕО+ФОТО | Анџелина Џоли го прослави 46-тиот роденден: Децата ме расплакаа, неверојатни се!
Актерката Анџелина Џоли го прослави 46-тиот роденден на 4 јуни, а иако не планирала никаква прослава, децата ѝ приредиле изненадување. Тие ја однеле својата мајка на вечера во популарен азиски ресторан во Лос Анџелес, а како што тврдат извори за американските медиуми, сите уживале таа ноќ.
– Тие одлично се забавуваа славејќи дома, а потоа децата ја изненадија со специјална вечера, открил извор близок на Анџелина.
– Моите деца се неверојатни! Јас сум инаку таа што ништо не планира, но тие имаат тенденција да соработуваат за да ме изненадат со нешто, без разлика дали е за роденден или за „Денот на мајките“… Самото спознавање дека нешто прават заедно, дека нешто смислуваат заедно, тоа секогаш ме допира и ме расплакува!
А, тие тогаш се шегуваат на моја сметка и ме задеваат, бидејќи солзи ми течат поради секоја ситница. Не би поверувале колкупати плачам во денот – рекла Анџелина.
Папараците ги „уловиле“ Анџелина и нејзините шест деца на улиците на Лос Анџелес, меѓутоа, како и обично, тие не биле расположени за фотографирање. Анџелина носела жолт, свилен фустан, додека децата биле лежерно облечени, а сите носеле заштитни маски.
Сигурно дека ѝ годела вечерата со децата, бидејќи штотуку заврши бракоразводната парница со Бред Пит, која траеше со години. Анџелина е разочарана од судската одлука, бидејќи старателството е сепак заедничко, иако таа сакаше децата да ѝ припаднат нејзе.