Еврејската заедница синоќа го одбележа Ханука, празникот на чудото и светлината, на третиот од осумте дена, колку што се слави.

Молитвата се одржа во синагогата Бет Јаков, а на истата, освен членовите на заедницата, присуствуваа гости и од другите религиозни заедници, претставници на амбасадите во земјава, како и претседателот на државата, Стево Пендаровски и министерот за внатрешни работи, Оливер Спасовски.

Во дворот на заедницата, се обрати претседателот на еврејската заедницата, Пепо Леви, кој говореше за значењето на Ханука, а потоа заедно со гостите Пендаровски и Спасовски ги запалија свеќите на ханукијата, специјалниот осумкрак свеќник за Ханука.

-Ханука е голем празник за евројскиот народ, празник на светлината. Настан што се случил во 168 година пред новата ера. Се празнува како сеќавање на ослободителната борба на еврејскиот народ на тлото на древниот Израел против елинистичкиот окупатор. Легендата вели дека по уништувањето на ерусалимскиот храм, во него било пронајдено масло за менора, кое било доволно само за еден ден. Но, маслото во кандилото горело цели осум дена, што во јудаизмот се смета за чудо. По ова, Ханука се смета за празник на светлината и заедништвото на еврејскиот народ, истакна Леви.

Како и многу еврејски празници, така и Ханука има свои обичаи и традиции, објаснува Леви.

-Се палат осум свеќи на ханукија, празникот е осум дена и секој ден се пали по една свеќа“, истакна претседателот на еврејската заедницата.

Чествувањето на празникот почнува на 18 декември на зајдисонце и ќе трае до 26 декември, целиот прилог со Пепо Леви проследете го на следното видео: