Фудбалерите на Евертон денеска го совладаа составот на Барнли со 2:0 на домашен терен во 29 коло од Премиер лигата.

Со новата победа, Евертон стигна до 43 бода и осмо место на табелата, што ги задржа во борбата за место во Европа, иако е тешко да се очекува сите ривали кои се во подобра позиција да влезат во низа лоши резултати.

Барнли, од друга страна е поблиску до враќање во Чемпионшип и само чудо може да ги задржи во Премиер лигата до крајот на сезоната.

Домашниот тим уште од стартот на мечот постепено го зголемуваше притисокот, а наградата дојде во 32 минута. По слободниот удар изведен од Џејмс Гарнер, највисок во скокот беше Џејмс Тарковски, кој со прецизен удар со глава од пет метри го погоди долниот десен агол за водство од 1:0.

Вториот гол се случи во 60 минута, Кирнан Дјусбери-Хол реагираше одлично во шеснаесетникот и го совлада Мартин Дубравка со моќен удар во средината на голот за 2:0.

Во следното коло, Евертон ќе гостува кај Арсенал, додека Барнли ќе го пречека Борнмут.