Во експлозија на гас во предградие на Отава, главниот град на Канада, повредени се 12 лица, меѓу кои две деца, а две лица со тешки повреди морале да бидат извлечени од урнатините, соопштија официјални претставници.

Во експлозијата што се случи утринава по локално време, целосно се уништени четири куќи во изградба, а оштетени се и околните куќи.

The moment of a massive explosion at a construction site caught on doorbell camera from a nearby east Ottawa home on Monday, Feb. 13, 2023. https://t.co/GsAkuc8LgH pic.twitter.com/BAPZnp53pe

— CTV News (@CTVNews) February 13, 2023

Според официјалните претставници, експлозијата се случила во 6:18 часот, а пожарникарите морале да употребат моторна пила за да пробијат до една од закопаните жртви. Три часа подоцна успеале да спасат уште едно лице „кое било опкружено со огромно количество отпад“.

Пожарникарите соопштија дека експлозијата била предизвикана од истекување на гас, а полицијата го истражува случајот.

Меѓу шесте лица кои веднаш биле пренесени во болница има две деца. Двајца мажи имаат сериозни повреди, но се во стабилна состојба, соопшти болничкиот персонал.

Уништените куќи ги изгради компанијата „Минто Груп“, која соопшти дека обезбедила привремено сместување за дел од раселените по експлозијата. Компанијата, како што соопштија нејзините претставници, соработува со истражните органи.