Владата на САД го одобри преземањето на медиумската компанија Ворнер Брос Дискавери од страна на Парамаунт Глобал без да постави никакви услови. Министерството за правда заклучи дека спојувањето нема да им наштети на конкуренцијата или на американските потрошувачи, ниту во телевизискиот и стриминг бизнисот, ниту во филмската продукција.

Прегледите на конкуренцијата сè уште се во тек во неколку американски држави, како и надвор од САД, вклучително и во Европа. Нетфликс  првично склучи договор минатата година за преземање на стриминг и студискиот бизнис на Ворнер Брос. Дискавери. Тој договор потоа беше поништен од повисоките понуди на Парамаунт за целата компанија Ворнер Брос. Дискавери, вклучувајќи ги и телевизиските канали како Си-ен-ен. Договорот сега вреди околу 111 милијарди долари.

Критичарите во САД стравуваат дека Си-ен-ен  би можел да ја изгуби својата уредничка независност под сопственост на Парамаунт, која ја води филмскиот продуцент Дејвид Елисон, син на софтверскиот милијардер Лари Елисон, кој е поддржувач на американскиот претседател Доналд Трамп.

Си-ен-ен е особено важна за Трамп

Трамп во неколку наврати изјави дека му е особено важно што информативниот канал, кој често критички известува за него, исто така, ќе го смени сопственикот во договорот со Ворнер  Брос. Дискавери. Редакцијата на Си-Би-Ес, во сопственост на Парамаунт, се издвојуваше по своето поповолно известување за администрацијата на Трамп откако беше преземена од семејството Елисон.

Неколку новинари од популарната информативна емисија „60 минути“ беа отпуштени, а некои од нив се жалеа на политички притисок. „Ворнер Брос. Дискавери“ е позната по суперхероите на ДС Супермен и Бетмен, филмската франшиза за Хари Потер и силниот стриминг бизнис базиран на премиум ТВ каналот HBO.