Иако многумина прогнозираа лесна победа за Филаделфија поради бројните отсуства кај Денвер, Нагетс приреди вистинско изненадување. Со борбена и пожртвувана игра, Денвер по едно продолжение стигна до триумф од 125-124. Во исто време, Оклахома доживеа дебакл пред својата публика, откако беше убедливо поразена од Шарлот со 124-97.

Денвер настапи без неколку клучни играчи, Јокиќ, Мареј, Гордон, Валанчиунас, Хардавеј и уште неколкумина, но и покрај тоа тимот најде сили да слави. Натпреварот беше неизвесен од почеток до крај. Во завршницата на регуларниот дел Денвер водеше со 120-115 на нешто повеќе од една минута до крајот, но не успеа да постигне поен, што Филаделфија го искористи за да израмни. Имаше и шанса за победа, но без успех, па мечот влезе во продолжение (120-120).

Во дополнителните пет минути драмата продолжи. На четири секунди пред крајот, при резултат 123-124, Денвер беше прецизен од линијата за слободни фрлања, а потоа одигра цврста одбрана за конечна победа од 125-124.

Пикет беше прво име кај победниците со 29 поени, додека Вотсон додаде 24. Кај Филаделфија, Ембид доминираше со 32 поени и 10 скокови.

Од друга страна, најдобриот тим во лигата, Оклахома, го претрпе вториот пораз по ред, и тоа убедлив, откако Шарлот целосно го надигра на гостински терен. Милер блесна со 28 поени за Хорнетс, додека кај Оклахома најрасположен беше Џиџилс-Александер со 21 поен.