Поголем дел од демонстрантите кои вечерва се собраа на протест против „францускиот предлог“ пред Владата, каде ја пробија заштитната ограда и фрлаа со шишиња, јајца и камења кон полицијата, околу 20 часот и 30 минути се упатија кон Собранието.

Пред законодавниот дом исто така е урната заштитната ограда, а насобраните пеат патриотски песни, бараат оставки од властите и целосно отфрлање на европските и бугарските барања.

Денешниот масовен протест, трет по ред, започна во тензична атмосфера, откако денеска опозицискиот лидер Христијан Мицкоски ги повика граѓаните на најмасовно учество, поради тоа што имал информации дека властите утре ќе го прифатат францускиот предлог за решавање на спорот со Бугарија и почеток на преговори на Македонија за членство во ЕУ.