Новата бугарска поп-фолк сензација Лео неодамна го претстави својот дует со Алиша „Ти си мојот живот“. Во видеото, младиот пејач свири гитара, којашто е многу специјална, пишува бугарски „Сигнал“.

Гитарата е истата онаа на која легендарниот македонски пејач Тоше Проески ги свирел и творел своите големи хитови, а овој инструмент му бил омилен, откриваат неговите продуценти од „Хит микс мјузик“.

Тоше Проески беше миленик на публиката не само во Македонија, туку и на целиот Балкан.

„Сигнал“ пишува дека, за жал, Тоше загинал во сообраќајна несреќа на 16 октомври 2007 година. Пејачот зад себе остави многу хитови како „Чија си“, „Тајно моја“ и многу други, а љубовта на луѓето кон него не згаснува до ден-денес.

Како гитарата стасала во рацете на младиот Лео и дали е автентичната не е објаснето, нема детали околу тоа.

Во меѓувреме, дуетот на Алиша и Лео зема замав и брзо најде место меѓу врвните „зимски“ хитови. Фановите ја опишуваат комбинацијата меѓу двајцата уметници како „експлозивна“, а во Лео гледаат потенцијал кој може многу да придонесе за поп-фолкот.