ВИДЕО: Арсенал не се шегува, а само бод за Конте на дебито со Тотенхем!
Се одиграа уште три натпревари од 11 коло во Премиер лигата, Арсенал дома со 1:0 го совлада Ватфорд, Тотенхем без голови ремизираше со Евертон, а Лидс одигра 1:1 против Лестер.
Арсенал продолжува со успешните игри оваа сезона, „топџиите“ дојдоа и до шестата победа (трета по ред), остварена на стадионот „Емирати“ во Лондон.
Смит-Роу во 56 минута беше стрелец на единствениот гол, а триумфот можеше да биде поубедлив, доколку Обамејанг го реализираше пеналот во 36 минута.
Лидс пред своите верни навивачи водеше од 26 минута со погодокот на Рафиња, а „лисиците“ дојдоа до бод во 28 минута преку Барнс.
Во 67 минута Лукман, играчот на Лестер ја затресе мрежата на Мелие, но голот беше поништен поради офсајд.
Челси води на табелата со 26 бодови, три повеќе од Манчестер сити на втората позиција, следуваат Ливерпул (22) и Вест хем (20) кои имаат меч помалку, петтопласиран е Арсенал со 20, а на шестото место Манчестер јунајтед со 17, колку и седмопласираниот Брајтон.