ВИДЕО АНКЕТА | Сообраќајот во хаос, паркингот скап, но и да платиш нема место
Сообраќајот во Скопје е хаотичен, гужви, чекање во редици на сите раскрсници, паркинг место е чиста лотарија, посебно во централното градско подрачје. „Слободен печат“ ги праша граѓаните како се вози низ градот и како се снаоѓаат кога треба да паркираат?
Сите се едногласни кога е во прашање сообраќајниот хаос, од Влае до Центар се вози по половина час најмалку, а паркингот е посебна приказна. И да сакаш да платиш нема место.
– Секој ден патувам од Центар до Влае, за четири километри има 15 минути стоење. Паркингот е посебна приказна, еве овде е 250 денари еден час- вели еден скопјанец.
За друг цените на паркинг услугите се многу скапи, но и да платите нема паркинг место.
– Во Центар и Аеродром е најтешко да се паркира- вели граѓанин.
Друг објаснува дека најтешко е да се вози во централното градско подрачје.
-Секаде е метеж, цените на паркинзите се високи, сообраќајот е хаотичен. Кога сум пешак се расправам со возачите, како возач со пешаците- вели еден скопјанец.
Друг вели дека проблемот со паркирањето го има во сите општини.
-Сите тротоари се зафатени. Живеам на периферија конкретно во Хром, но и таму е комплицирано паркирањето. Во Центар работам подолго време, скап е паркингот посебно овде. Но и да платите, нема паркинг- вели скопјанец.
Кумановец пак објаснува дека во Скопје полесно се наоѓа паркинг од Куманово.
-Цените се добри освен 250 денари за еден час на некои паркинзи. Во Скопје подобро се вози од Куманово- вели тој.
Скопјанка објаснува дека возењето во Скопје е хаотично, тешко е за возење, но уште потешко за паркирање.
-Платив паркинг, но чекав да излезе некој да можам да се паркирам- вели таа.
Друга скопјанка вели дека нема сообраќајна култура, ниту кај возачи ниту кај пешаци.
-Најголем проблем има кај Народна банка, Мавровка, тешко се наоѓа паркинг и покрај високите цени. Се е изградено. Секој има по неколку коли, а улиците се исти- вели таа.
Целата анкета на колешката Александра Вуксановиќ погледнете ја во продолжение: