Триесет и едно дете се вратени во Украина откако илегално биле однесени во Русија од територијата контролирана од Москва, објави денеска на социјалните мрежи невладината организација „Спасете ја Украина“.

Според проценките на организацијата, од почетокот на војната, руската војска противправно депортирала околу 19.500 украински деца во далечни руски области.

„Денеска пречекуваме уште 31 дете коe илегално беше однесено во Русија од окупираната територија“, напиша Микола Кулеба, првиот човек на невладината организација.

Децата биле однесени во Русија од Харков (на североистокот на Украина) и од регионот Херсон (на југот), според организацијата чија главна задача е да се бори, како што наведува, против депортацијата на украинските деца.

Како што соопштија од организацијата, деца со патни торби и торби во петокот ја минале границата пеш, во придружба на роднините, а потоа се качиле во автобус за да го продолжат патувањето.