Американскиот министер за финансии Џенет Јелен денеска ја изрази својата силна јавна поддршка досега за идејата за трајно одземање на околу 300 милијарди американски долари замрзнат имот на Централната банка на Русија и нивно користење за долгорочна обнова на Украина.

„Неопходно е и итно нашата коалиција (за поддршка на Украина) да најде начин да ја открие вредноста на овој задржан имот, со цел да го поддржи континуираниот отпор на Украина и нејзината долгорочна реконструкција“, рече Јелен во изјавата подготвена за состанокот на групата во Сао Паоло, Бразил, каде се состануваат министрите за финансии и гувернерите на централните банки на Групата 20 (Г-20).

„Верувам дека постои силен меѓународен правен, економски и морален аргумент за напредок (кон тоа решение). Тоа би бил одлучувачки одговор на невидената руска закана за светската стабилност“, рече Јелен.

САД и нивните сојузници замрзнаа стотици милијарди долари од средствата на Руската централна банка што се чуваа во странство како одмазда за инвазијата на Москва на Украина. Тие милијарди се неискористени, а војната влезе во третата година, додека официјални лица од неколку земји дебатираа за законитоста да се испратат тие пари во Украина. Повеќе од две третини од задржаните средства на Централната банка на Русија се наоѓаат во ЕУ.

„Користењето на тие средства за помош на Украина „јасно би покажало дека Русија не може да победи со продолжување на војната и би ја поттикнало да дојде на маса и да преговара за праведен мир со Украина“, смета Јелен.