Македонија како општество многу преживеа, но многу малку научи, вели за Утрински брифинг експерот по финансии Зоран Јовановски и потпретседател на Стопанската комора, осврнувајќи се на економските текови во земјава кои тешко се менуваат.

-За разлика од друите земји кои произлегоа од некогашната СФРЈ ние не успеавме да направиме долгорочна стратегија за развој, не успеавме да се договориме која е нашата стратешка цел која ќе се следи независно од тоа кој е на власт, вели Јовановски за Утрински брифинг.

Нашиот неуспех е, како што вели Јовановски, што пропуштивме да го следиме старото правило дека секоја генерација е должна на следната да ѝ создаде подобра стартна точка. Еден од примерите за тоа е расчекорот меѓу стопанството и образованието што континуирано се провлекува веќе 30 години.

-Ние имаме ситуација кога имаме хиперинфлација на дипломи кои не можат да се валоризираат и монетизираат, а од друга страна стопанството се соочува со недостиг на соодветни кадри. Затоа е добро што се воведува дуалното образование. Тоа значи дека младите луѓе уште додека учат знаат дека кога ќе го завршат школувањето веќе ги чека работно место, а тоа пак дава некаква сигурност и стабилност, вели Јовановски за Утрински брифинг.

Тој потенцира дека е нужно да се свртиме кон т.н. зелена економија иако е тоа скапо за мали економии како нашата. Тоа е многу битно и светски тренд е да не се оди повеќе на раст по секоја цена. Трошоците за зелени економски проекти треба однапред да се предвидат за проектот да биде економски исплатлив, вели Јовановски и додава дека долгорочно тоа е единствениот пат затоа што финансиерите повеќе не сакаат да финансираат проекти кои се потпираат на фосилни горива.