Претставници на врвните европски фудбалски лиги ќе седнат со лидерите на УЕФА ова лето за да разговараат за тоа како се користи ВАР, со јасна цел – да се врати технологијата на нејзината првобитна намена и да се намалат интервенциите на оние навистина очигледни судиски грешки.

Состанокот, свикан од главниот судија на УЕФА, Роберто Росети, ќе ги собере водечките судии од Премиер лигата, Ла Лига, Серија А, Бундеслигата и Лига 1. Главната тема ќе биде потребата од еден вид ресетирање на ВАР, односно усогласување на критериумите според кои се вклучува во натпреварите, пренесува „Атлетик“.

Росети претходно предупреди дека фудбалот не смее да оди во насока на „микроскопски ВАР интервенции“, велејќи дека е потребно да се вратиме на оригиналните принципи за кои е воведена технологијата. Затоа, УЕФА сака да отвори разговор со врвните лиги за разликите во примената на ВАР и праговите што одредуваат кога да се реагира.

„Верувам дека заборавивме зошто ВАР беше воведен на прво место. За објективни одлуки, тој е фантастичен. Но, во ситуации што зависат од толкување, субјективната проценка е многу потешка. Затоа почнавме да зборуваме за јасни и очигледни грешки, или јасни докази – рече Росети.

Податоците покажуваат дека ВАР се користи многу нерамномерно низ цела Европа. Премиер лигата има најмал број интервенции оваа сезона – 0,275 по натпревар, иако тоа не значи дека имало помалку контроверзии околу судиските одлуки. Бундеслигата и Ла Лига имаат регистрирано просек од 0,38 интервенции по натпревар, Серија А 0,44, а Лига 1 дури 0,47. Во Лигата на шампионите, просекот е 0,45 интервенции по натпревар.

Затоа Росети се залага за поунифициран пристап и сака сите лиги да користат „еден технички јазик“, особено по бројните контроверзии околу недоследната примена на правилата. УЕФА се надева дека летниот состанок би можел да донесе појасни и поунифицирани упатства, како за толкувањето на правилата, така и за употребата на самата ВАР технологија.