– Сè уште не е познато до кој степен епидемијата на коронавирус што ја погоди Италија, една од 12-те земји домаќини на наредното ЕП, ќе влијае на одржувањето на континенталниот собир, кој е закажан да започне во јуни – изјави денеска потпретседателот на УЕФА.

Бројот на случаи во Италија се зголеми на скоро 300, при што седум лица загинаа од опасниот вирус. Најмногу се погодени најсеверните региони Ломбардија и Венето.

Откажани се бројни спортски настани во Италија, вклучувајќи ги и натпреварите во Серија А, а шесте натпревари закажани за викендот ќе се играат пред празни трибини.

Во Рим, кој ќе биде домаќин на отворањето на ЕП на 12 јуни, во моментов нема случаи на коронавирус, но челниците на европскиот фудбал се претпазливи и велат дека внимателно ја следат ситуацијата.

– Ние сме во фаза на чекање. Ние ја следиме ситуацијата во секоја земја и мора да ги следиме наредбите на владите на тие земја – рече член на Извршниот одбор на УЕФА, Микеле Ува, за „Раи“, додавајќи дека спортските натпревари ќе бидат откажани само доколку ситуацијата се влоши.

Наполи денеска ќе ја пречека Барселона во првиот натпревар од осминафиналето во Лигата на шампионите, а немаше предлози да се одложи натпреварот или да се игра пред празни трибини.

Дуелот Интер и Лудогорец во Милано во Лига Европа во четврток ќе се игра без гледачи, а на сите што купиле билети ќе им бидат вратени парите.

Италијанската федерација на мечување објави дека го откажала Светскиот куп, кој требаше да се одржи во Падова од 6-8 март.