Веста се објавуваше 24 часа по порталите, но на албанската полиција дури по полноќ и пристигна потврда од холандските власти за егзекуцијата на Фестим Лато, самопрогласениот “Претседател на Чамерија”, пренесува Топ Чанел.

Странските медиуми известуваат дека случаен минувач го пронајде телото во вода околу 5 часот наутро во петокот, во Холандија. Првично се сомневаше дека мртвото тело му припаѓало на полски државјанин, но потоа се покажало дека станува збор за албанскиот бизнисмен Фестим Лато, кој 25 години живеел во Холандија.

Според весникот Де Гелдерландер, Лато избегнувал „армија“ на доверители веќе подолго време. Тој беше прогласен како банкротиран од Судот во Жутфен во април оваа година. И покрај тоа, сè уште не е познато дали ова е поврзано со неговото убиство.

Еден добар пријател на Лато ја потврдил неговата смрт за Де Гелдерланд. Тој изјавил за весникот дека неодамна се среќавал и немал причина да верува дека нешто лошо ќе му се случи.

Ангело Алиу, самопрогласениот премиер на Република Чамерија, ја потврди смртта на Лато на Фејсбук. Тој рече дека е шокиран од смртта и го нарече „политички мотивирано убиство на херој на Чамерија”.

Холандскиот дипломат Јероен Зандберг од UNPO – Организација со седиште во Хаг за држави, региони и незастапени народи – изјави за Де Гелдерландер дека Лато бил вмешан во сомнителни работи, пренесува Топ Чанел.

Балканвеб пак јавува дека Фестим Лато, самопрогласениот претседател на Република Чамерија, живееше во Холандија веќе 25 години. Тој беше познат како бизнисмен, но исто така и како еден од најагласните активисти за прашањето на Чамите.

Роден во Валона, Албанија, Лато беше преселен во Холандија, а Република Чамерија ја прогласи на 30 октомври 2016 година. Тој дури вети во 2017 година дека наскоро ќе ги произведе првите 500 пасоши на Чамерија.

– За кратко време, според информациите што ги имам од различни извори, знам дека границите ќе се променат, но во корист на Албанците. Ниту една дланка албанска земја нема да помине на рацете на Грците, Македонците или Црногорците. Сите овие земји ќе се собираат и ќе се соединат во еден центар, во тоа што се нарекува Природна Албанија – изјавил Фестим Лато пред неколку години.

Балканвеб пренесува дека во грчките медиуми долго време се зборуваше за Фестим Лато, кои го оценуваа како опасна личност за Грција, бидејќи овој човек и се заканувал на грчката држава дека ќе ја расформира бидејќи нема да им го прости тоа што Грција му направи на населението на Чамите. Според истиот медиум грчката држава е во отворено судење со Фестим Лато во Хашкиот трибунал за злосторства против човештвото.

Албанската политика имаше речиси пасивен став кон Фестим Лато и честопати блокирачки, кога тој го повикуваше народот да му веруваат на него за проект што тој го презентираше за да создаде Албанија каде што сите би сонувале да живеат, опфаќајќи ја територијата на Чамерија.
Исто така, во 2005 година тој ја прогласи Ослободителната војска на Чамерија, која во градот Јанина во тоа време дистрибуираше летоци за ослободување на Чамерија од Грција.