Во очекуване да пристигнат најавените Ф-16 авиони во Украина, Русија со предупредување вели дека тие ќе се третираат како ескалација со оглед на нивниот потенцијал како платформи за нуклеарно оружје.

„Без разлика каква модификација на авионот ќе биде испорачан, ние ќе ги третираме како нуклеарни способни и овој чекор на САД и НАТО ќе го сметаме за намерна провокација“, се вели во соопштението на руското Министерство за надворешни работи.

Министерството рече дека НАТО ја турка војната во Украина поблиску до „точката каде што ќе достигне „критична маса“ и ќе „експлодира“.

Се очекува Украина наскоро да ги добие првите ветени Ф-16 од членките на НАТО.

Белгија, Данска, Норвешка и Холандија ветија неколку десетици борбени авиони од овој тип на Киев, а украинските пилоти тренираат како да ги користат овие летала.

„Ако тие не го разбираат ова, тогаш тие се безвредни како воени стратези и планери“, рече рускиот министер за надворешни работи Сергеј Лавров во јуни.

Но, не е јасно како само Ф-16 би направиле значајна разлика во секој нуклеарен напад против Русија, бидејќи некои советски воени авиони што ги користи Украина, како што се Су-24 и МиГ-29, веќе може да се модифицираат за да носат нуклеарно оружје.

Способноста на Су-24 во овој поглед беше наведена дури и од рускиот сојузник Белорусија, која во август 2022 година рече дека нејзината војска ги изменила своите Су-24 за да носат тактичко нуклеарно оружје.

Минск рече дека е подготвен да го распореди оружјето како одговор на заканите од Западот.

Украинскиот Су-24 сега може да ја лансира британската ракета „Storm Shadow“, иако не е веднаш јасно дали овој успех може да се повтори и со нуклеарно оружје.

Во секој случај, Украина не поседува никакво нуклеарно оружје во својот арсенал, бидејќи го предаде во 1994 година кога се стекна со независност.

Тоа е предмет на Договорот за неширење на нуклеарно оружје.

Русија, од своја страна, редовно се закануваше дека ќе користи тактичко нуклеарно оружје доколку почувствува дека Западот преминал одредени црвени линии, иако се тврди дека станува збор за блеф од руска страна.

Ф-16 е поздравен како значајна надградба на старата флота на Киев од советската ера, со подолг дострел, подобри способности за оружје и други подобрувања, вклучително и во маневрирањето. Тие се, исто така, подобро усогласени со голем дел од американската опрема што ја добива Украина, како што се брзите противрадијациони проектили, наменети за копнени цели.

Сепак, во војна во која ниту Киев ниту Москва не можеа да постигнат надмоќ во воздухот, набљудувачите не се сигурни колку Ф-16 значително ќе го промени пејзажот на конфликтот.

Русија распореди напредни системи за воздушна одбрана како што е С-400, од ​​кои некои се пософистицирани и поефикасни од заканите со кои се соочуваа Ф-16 во претходните воени зони, објави Џејк Епштајн од „Business Insider“.