Британскиот крал Чарлс III би можел за време на планираната државна посета на Соединетите Американски Држави во април да биде примен во привремен шатор на Јужниот тревник на Белата куќа, со користење преносни тоалети, објави „Телеграф“.

На таа можност укажа секретарот на Белата куќа, Вил Шарф, наведувајќи дека поради ограничениот капацитет на Источната сала, веќе со години државните банкети и приеми за странски лидери се организираат во големи шатори поставени пред Белата куќа.

За време на ваквите настани, за гостите се поставуваат надворешни тоалети за да не мораат да се движат до Белата куќа и назад.

Шарф напомена дека на кралот веројатно ќе му бидат обезбедени истите услови, вклучително и преносни тоалети.

Тој ја наведе оваа ситуација како една од причините за уривање на Источното крило на Белата куќа и изградба на нова голема балска сала, оценувајќи дека ваквиот начин на организација „не остава добар впечаток за САД“.

„Мислам дека е значајно тоа што кога претседателот на Соединетите Американски Држави патува во Обединетото Кралство, тој е пречекан во замокот Виндзор. А кога следната година британскиот крал ќе дојде во Соединетите Американски Држави, најверојатно ќе биде примен во шатор на Јужниот тревник со преносни тоалети. Тоа, за мене, не остава добра слика за Соединетите Американски Држави“, изјави Шарф, еден од главните помошници на американскиот претседател Доналд Трамп, за време на состанокот на Националната комисија за капитално планирање (NCPC).

Работите за уривање на Источното крило започнаа во октомври минатата година, а новата балска сала со површина од околу 90.000 квадратни метри треба да прими околу 1.000 гости.

Проектот е дел од обновата на Белата куќа вредна околу 400 милиони долари, а неговото завршување се очекува до крајот на вториот мандат на Трамп, во јануари 2029 година.

Од Белата куќа соопштија дека одлуката за уривање е донесена поради долгогодишни проблеми со прокиснување и појава на мувла, со оценка дека целосната реконструкција е долгорочно поисплатлива од зачувувањето на постојниот објект.

Претставниците на Националната комисија за планирање на главниот град ја разгледуваат и можноста за доградба на Западното крило, со цел да се зачува архитектонската рамнотежа на комплексот.

Шалом Баранес, архитект на балската сала, изјави дека официјалните лица размислуваат за доградба на еден кат на Западното крило, со цел да се врати „симетријата“ на дизајнот.

NCPC, чиј претседател е Шарф, е надлежен за одобрување на изградбата и поголемите реконструкции на државни објекти во областа на Вашингтон.