Американскиот претседател Доналд Трамп објави дека е постигнат „многу силен“ трговски договор со Европската Унија, кој ќе ги намали бариерите за американскиот извоз и ќе обезбеди нови европски инвестиции во САД.

Ова е огромен договор. Луѓето не разбираат – тој е поголем од сите други. И тоа ќе се случи – треба да се случи – рече Трамп, зборувајќи од своето голф игралиште „Тарнбери“ во Шкотска по средбата со претседателката на Европската комисија, Урсула фон дер Лајен.

Трамп разговораше со фон дер Лајен денеска пред крајниот рок во петок до кога требаше да се постигне трговски договор за да се избегнат царини од 30% за европскиот увоз.

Европската Унија ќе се согласи да купи енергија од САД во вредност од 750 милијарди долари. Тие ќе се согласат да инвестираат во САД 600 милијарди долари повеќе отколку што веќе инвестираат, рече Трамп, како што пренесува „Си-Ен-Ен“.

Трамп нагласи дека увозот од ЕУ ќе се царини со 15%, откако претходно се закануваше со двојно поголеми давачки.

Договорот го потврди и претседателката на Европската комисија Фон дер Лајен.

Сакавме да ги балансираме трговските односи – рече Фон дер Лајен, потврдувајќи го постигнатиот напредок.

Договорот беше постигнат кратко откако Трамп ги критикуваше претходните трговски договори, нарекувајќи ги „еднострани и нефер“.