Токио очекува притисок врз здравствениот систем
Властите во Токио, градот домаќин на Олимписките игри, бараат од болниците да подготват повеќе легла за пациенти со Ковид-19, бидејќи главниот град на Јапонија се бори со зголемување на бројот на новоинфицирани, јави ТВ-каналот ТБС.
Со оглед на тоа дека болниците примаат сè поголем број пациенти со Ковид-19, властите во Токио сакаат да го зголемат бројот на болнички кревети од сегашните 5.967 на 6.406 до почетокот на август.
Телевизијата посочува дека болниците треба да разгледаат нов план и да ги одложат (неитните) хируршки интервенции, но исто така да го намалат бројот на приеми на не-ковид пациенти.
Дневниот број на новозаразени лица во Токио, каде пристигнаа учесници, спортисти и делегации од странство поради Олимписките игри, вчера беше 1.429, двојно повеќе од пред една недела.
Во Јапонија досега само 36 проценти од населението примило барем една доза од вакцината.