ТФТ Скопје со убедлив пораз ја почната серијата против Борац Чачак од 97-61 во борбата за место во АБА лигата.

Српскиот состав уште од самиот старт наметна силно темпо и целосно ја презеде контролата врз натпреварот. Борац беше одлично расположен во нападот, па по првите 20 минути игра веќе имаше висока предност од 54-32.

Во продолжението македонскиот тим не успеа да пронајде решение за расположениот противник, кој без поголеми проблеми ја одржуваше разликата и рутински стигна до убедлив триумф. Најефикасни во победничкиот тим беа Јошило и Николиќ со по 20 поени, додека Дејвис Јуниор додаде 17 поени.

Реваншот меѓу двете екипи ќе се игра на 10 мај со почеток од 20 часот, а ТФТ ќе се надева дека ќе успее да дојде до првата победа против Борац, кој сезонава се бори за опстанок во регионалната елита.

Скопскиот состав претходно настапи и во финалето на АБА2-лигата, каде што беше поразен од Широки Бријег.