Тажна вест: Почина Мемет, младиот колпортер на „Лице в лице“, имаше само 19 години
„Со тага и неверување споделуваме со вас дека поради здравствени компликации почина Мемет Камбер, нашиот продавач од редовите на Daycare Centre for street children/ Дневен Центар за деца на улица, соопштија од списанието „Лице в лице“.
„Публиката на „Лице в лице“ го гледаше често во неговото омилено Дебар Маало“, пишува во објавата на социјалните мрежи.
„Не останувавме рамнодушни на неговата насмевка, на мекоста и топлината кои зрачеа од него. Ќе го паметиме Мемет како кроток и љубезен млад човек, вреден и скромен. Другаруваше со сите продавачи на списанието, тука беше да сподели трик, да каже нешто за добрината. Веруваше во љубовта и грижата на луѓето кои секогаш го поддржуваа. Сонуваше да сними рап песна и да стане познат рапер. Сочувство до семејството и блиските“, велат од „Лице в лице“.
Ова е снимка од декември 2021 година, кога Мемед беше еден од продавачите на „Лице в лице“ во дружба со поетите Горазд Кени и Ана Голејшка Џикова:
„Лице в лице“ е улично списание, кое излегува во Македонија од септември 2012 година, и го промовира моделот на социјално претприемништво. Продавачи на списанието се претставници од најранливите групи во општеството, кои се обучуваат за продажба од страна на тим на платформата. Половина од сумата на списанието (кое чини 100 денари) оди за продавачот, а половина за печатење и за активности кои го подобруваат животот на маргинализираните групи.