Претседателката на „Транспаренси интернешнл Македонија“, Слаѓана Тасева во вечерашното издание на емисијата „360 степени“ на темата за случајот со набавката на софтверот за сообраќајни прекршоци рече дека Владата требало веднаш да го разреши Драги Рашковски од функцијата секретар во кабинетот на премиерот.

– Владата требаше веднаш да го разреши, а не да чека тој да поднесе оставка на еден или два дена пред да се отвори истрага против него, вели Тасева.

Исто така, таа ги искоментира и изјавите на премиерот Зоран Заев, кој во неколку наврати отворено го поддржа Рашковски велејќи дека набавката на софтверот за сообраќајни прекршоци била законска и според процедурите.

– Премиерот сме го виделе неколкупати со такви изјави, но сметам дека треба да се воздржува од такви коментари. Особено кога не учествувал во целост, односно не знаеме што се случувало во позадина. Но, сепак, набавката можеби била спроведена во целост законски, но како дошло до тоа и што се случувало наоколу е друго прашање. Затоа, велам дека секогаш треба да се има воздржаност, вели Тасева.