Врховниот лидер на Иран, ајатолахот Али Хамнеи, има план да избега од земјата доколку безбедносните сили не успеат да ги задушат протестите или престанат да ги почитуваат неговите наредби, според разузнавачки извештај цитиран од „Тајмс“.

Во извештајот се вели дека 86-годишниот Хамнеи планира да го напушти Техеран со тесен круг од 20-тина лица, вклучувајќи го и неговиот син Моџтаба Хамнеи, кој се смета за можен наследник. Планот ќе се активира доколку се утврди дека војската и безбедносните сили дезертираат или одбиваат да ги извршуваат наредбите.

Поранешен израелски разузнавачки службеник изјави дека најверојатната дестинација за бегство би била Москва, истакнувајќи дека Хамнеи одржува блиски односи со Русија и изразува восхит кон Владимир Путин. Планот, според истите извори, се базира на преседанот на бегството на поранешниот сириски претседател Башар ал-Асад.

Изданието, исто така, објавува дека Хамнеи има средства вредни десетици милијарди долари преку организации контролирани од него, додека неколку членови на неговиот најблизок круг имаат роднини што веќе живеат во странство.

Информациите излегуваат на виделина додека во тек се масовните демонстрации во многу градови во Иран, вклучувајќи го и религиозниот град Ком, поради економската криза.

Демонстрантите ја осудуваат насилната репресија од страна на безбедносните сили, кои се под директна контрола на врховниот лидер, во време кога отсуството на Хамнеи од јавната сцена покрена силни прашања во земјата.

ВИДЕО Ескалираат протестите во Иран: Улиците горат, има и мртви