Судот одлучи на поранешната директорка на агенцијата за европски програми, Лидија Димова и на Александар Гочев да им определи мерки – Одземање на патната или друга исправа за преминување на државната граница, обврска за повремено јавување во судот и забрана за вршење на одредени работни дејствија.

Судот претходно одлучи да му биде одземен пасошот и на Зоран Златковски, сопственик на фризерницата В.Е.З. Трејд, фирма која од Националната агенција добила 270 илјади евра.

Обвинителството за гонење организиран криминал и корупција отвори случај по претходна кривична пријава од Финансиската полиција. Во неа се сомничат четири лица, односно, Лидија Димова, Александар Гочев, Зоран Златковски и благајничката Ана Павлиду.

Димова и нејзините соработници се осомничени за измама, а кривичната пријава им ја поднесе финансиската полиција. Според пријавата тие предизвикале штета од над 400.000 евра.