Музичката научна конференција „Струшка музичка есен“, која се реализира од 1975 година, во своето 44-издание се одржува од 25 до 27 септември во хотелот „Дрим“ во Струга. Темата „Музиката во/низ просторот и времето“ создава можност за дијалог со музичкото творештво создавано во поблиското и подалечното минато, а потрагата на музиколозите по музичкото творештво од минатото може да прерасне во продолжителна нишка и инспирација на музичките творци од генерациите што следат.

– Овој широк дијапазон на процеси во развојот на музичката уметност од разни временски периоди зафаќаат и актуелни прашања од музичкото современие, како што се: формите на музичкото образование, влијанието на одредени школи, правци и тенденции во музичкото творештво, корелацијата со другите уметности, квалитетот на музичките содржини и стилските карактеристики на нивните изведби и др. Начините на чување на музичките оставини на композиторите, формите и методите за реконструкција на творештвото на музичките уметници, заштитата на музичкото културно наследство се, исто така, дел од овој развоен процес на музичката уметност – посочуваат организаторите на конференцијата.

Во рамки на конференцијата ќе бидат одбележани јубилеите на македонските творци Властимир Николовски (95 години од раѓање), Томислав Зографски (20 години од смртта) и Томе Манчев (70 години од раѓање). Конференцијата е структуирана во сесии со физичко присуство и електронски сесии преку платформата „Зум“. Во организација на СОКОМ селекторка на СМЕ 2020 е д-р Мирјана Павловска-Шулајковска.

(Текстот е објавен во „Културен печат“ број 50, во печатеното издание на „Слободен печат“ на 26-27 септември 2020)