Цената на електричната енергија што ја плаќаат домаќинствата на регулираниот пазар се зголемува за 7,4 отсто, а граѓаните и понатаму ќе можат да ја користат евтината тарифа во истите период како и досега, потврди претседателот на Регулаторната комисија за енергетика (РКЕ) Марко Бислимоски. Поскапување на струјата, како што кажа, побарале сите електроенергетски компании поради проблемите што ги предизвика кризата со коронавирусот ковид-19. ЕСМ има намалување на приходите од продажба на вишоци на електрична енергија од 17 милиони евра, а МЕПСО намалување на приходите од 11 милиони евра.

– РКЕ ја одобрува крајната цена на електричната енергија, во која се пресметани и трошоците на МЕПСО за пренос на електрична енергија, Електродистрибуција за дистрибуција на електрична енергија, МЕМО за организирање и управување со пазарот на електрична енергија, како и трошокот за набавена електрична енергија. Со сите овие елементи, просечната крајна цена за досегашна сметка од 1.500 денари ќе има  зголемување од околу 100 денари – објасни Бислимоски.

Според јавно достапните податоци, цената за ЕВН Хоме се определува на просечен износ од 4,92 денари за еден киловат-час електрична енергија. Високата тарифа т.е. „скапата струја“ во иднина ќе чини 5,95 денари за еден киловат-час и тоа е поскапо за 7,4 отсто од досегашната цена која изнесува 5,54 денари за киловат-час. „Евтината струја“ односно ниската тарифа по ново ќе изнесува 2,99 денари и тоа е покачување за 7,5 отсто во однос на тоа што досега го плаќаа граѓаните кога користеа евтина струја, која чинеше 2,78 денари за еден киловат-час. Одлуката за цената за струјата требаше да биде донесена на крајот на јуни и да важи од 1 август, но поради предвремените парламентарни избори беше одложена.