Германскиот гигант Баерн Минхен вчера забележа убедлива победа против Викторија Плзен, а со тоа „Баварците“ ја продолжија одличната низа на непоразеност во групната фаза од најелитното европско натпреварување.

Викторија Плзен беше декласирана со 5:0, а оние кои ја гледаа оваа средба знаат дека триумфот можеше да биде и далеку поубедлив со оглед на шансите кои ги имаше тимот на Јулијан Нагелсман.

За Баерн ова беше 31 натпревар во низа на кој е непоразен во Лигата на шампионите. Со ова тие го срушија рекордот на Реал Мадрид кој во ова натпреварување немаше пораз на 30 натпревари во период од 2012 до 2017 година.

Последниот пораз на Баерн во Лигата на шампионите се случи во 2017 година, а од тогаш имаат 28 победи и три нерешени натпревари. Големи шанси има Баерн и да го продолжи овој рекорд со оглед на тоа дека во следното коло повторно игра против Викторија Плзен, овој пат на гостински терен.