Стојановски прави трансфер во Хрватска, дебито в сабота против Хајдук?!
Како што пренесува хрватскиот „Индекс“, екипата на Горица би требало да промовира три нови засилувања..Помеѓу нив се одвојува и името на македонскиот репрезентативец Влатко Стојановски кој настапи летово на Европското првенство.
Истиот извор вели дека Стојановски доаѓа од францускиот клуб Ним како слободен играч..
Минатата натпреварувачка сезона нашиот 24-годишен напаѓач беше на позајмица во Шамбли, во тамошната француска втора лига со 11 настапи.
Стојановски веќе има искуство од Хрватска каде што пред да се пресели во тетовската Ренова беше дел од Дугопоље и Сплит. Исто така ги бранеше и боите на скопски Металург.
Неговото доаѓање во Горица веќе е договорено, и тренерот на овој клуб Рендулиќ би можел да го има на располагање Македонецот веќе за саботниот натпревар од четвртото коло во најсилната хрватска лига против Хајдук.