Собранието ги усвои измените на Законот за земање и пресадување на делови од човечкото тело заради лекување. Со нив секој граѓанин кај матичниот лекар ќе даде изјава дали сака да биде органодарител по завршувањето на животот.

Со усвојувањето на овој закон се унапредува правната и институционалната рамка за органодарителство и трансплантација, преку појасно изразување и евидентирање на личната волја на граѓаните, проширување на можностите за лекување и отстранување на дел од административните пречки во системот. Законот претставува значаен чекор кон пофункционален, поефикасен и подостоинствен систем на органодарителство и трансплантација, во интерес на пациентите и на јавното здравје, велат од Министерството за здравство.

Министерот за здравство Азир Алиу рече дека прв ќе се регистрира како органодарител.
Според него, изјаснувањето ќе се врши преку нов дигитален модул во „Мој термин“, безбедно и со двојна верификација. Секој граѓанин ќе може во секое време да ја промени или да ја повлече својата одлука.