Пар од Србија и нивното двегодишно дете повредени во вчерашната несреќа кај скопскиот аеродром — МВР со детали
Пар од Србија и нивното двегодишно дете биле повредени откако нивното возило се превртело во вчерашната несреќа кај Меѓународниот аеродром Скопје.
Препорачано
Според информациите од СВР Скопје, несреќата била пријавена околу 5:30 часот, кога на сервисната улица што го поврзува автопатот со аеродромот, патничко возило „нисан“ со српски регистарски таблички, управувано од 33-годишниот Н.Ѓ. од Србија, удрило во метална ограда и се превртело.
„Во несреќата со тешки телесни повреди се здобил возачот и неговата сопатничка А.Ѓ.(26) од Србија, додека со телесни повреди се здобило нивното двегодишно дете, констатирани во Комплекс клиники ‘Мајка Тереза’ во Скопје. Извршен е увид од јавен обвинител и увидна екипа на СВР Скопје“, соопштија од МВР.
Поради несреќата, сообраќајот на автопатот Куманово – Велес, кај исклучокот од Скопје кон аеродромот, беше во прекин од 6:06 часот и беше пренасочен преку клучката Рафинерија кај Миладиновци.
Од ТАВ Македонија информираа дека привремено бил изменет и режимот на движење кон терминалната зграда, при што возилата биле насочувани по алтернативни правци, а пристапот до аеродромот бил овозможен преку стариот влез.
Сообраќајот подоцна беше нормализиран.
Увид на местото на несреќата извршиле јавен обвинител и увидна екипа на СВР Скопје.
Се преврте кола кај скопскиот аеродром — има повредени, патот е затворен за сообраќај
