Од следната година, во секоја државна и локална институција, младите ќе ги пречекува „службеник за млади“ кој ќе им ги одговара на прашањата од доменот на неговата институција, како на пример самовработувањето, програмите во министерствата и се што ги интересира, а досега немало кој подробно да им го објасни. Овие работни места се предвидени со новиот Закон за млади кој вчера беше изгласан во Собранието.

– Ни недостасуваше политичко учество на младите во Македонија. Партиските подмладоци мобилизираат најголем број луѓе. Првпат се отвора дијалог меѓу младите и партиските подмладоци. Се надевам дека во новиот пратенички состав ќе има повеќе млади пратеници за да може да го продолжат имплементирањето на Законот – изјави за „Слободен печат“
Ивана Туфегџиќ, пратеничка во Собранието и една од предлагачите на Законот.

Законот е правен по литвански и словенечки терк, а причината поради која е донесен е тоа што веќе години во Македонија нема официјално младинско тело кое ќе ги застапува интересите на оваа категорија граѓани при носењето на закони и политики на државно и на локално ниво.