Сликарско „Велигденско празнување“ на Елизабета Костова во „Ко-Ра“
Во галеријата „Ко-Ра“ е поставена изложбата „Велигденско празнување“ на Елизабета Костова. Изложбата ја отвори кураторот при Домот на културата „Кочо Рацин“ во Скопје, историчарката на уметност Виолета Калиќ, а ова е седма самостојна изложба на Костова.
Изложбата е посветена на чествувањето на големиот христијански празник Велигден, како и досегашните изложби, кои биле посветени и биле дел од најразлични празнувања, по најразлични поводи.
– Низ сликарската визура на Елизабета Костова ни е презентирана една кревка суптилност, една поетика која провева во сите нејзини дела. Тие во себе носат непретенциозност од сферата на интимизмот, едноставно како оттргнати од еден миг, кој воедно обединува и носталгичност и меланхолија и свеченост на празнувањето. Амбиентот и амбиенталноста со сите тие вткаени сегменти и елементи метафорично побудуваат разнородни асоцијации, ја пренесуваат не само атмосферата, туку и амбиенталноста на тоа празнично славење, прославување или исчекување на големите празници, каде се навраќаме со сето битие, не само на она што во мигот го чувствуваме, туку и сето она што поимот празник го носи како феномен – истакнува историчарката на уметност Виолета Калиќ.
Сликарството на Елизабета Костова е нежно, етерично, грацилно, каква што е, всушност, и нејзината уметничка личност. Во нејзиното сликарство се среќаваат нежни, грациозни женски ликови, како што е и таа самата.
Во нејзините слики жената како мајка, како заштитничка на огништето, домот и семејството, го држи пред себе садот со велигденски јајца, како симбол на животот, на зародишот, на изворот на животот, што е воедно и самата таа. Нежно одбраните пастелни тонови будат кревкост, суптилност на изразот, интимност на домот и семејството, и будат најпрефинети естетски чувства, извести Светлана Вељановска.