Галеријата „Метаноја“ во соработка со Здружението за култура „Транзен“ ја организираше изложбата „Несовршен простор 7“ со наслов „Созерцанија“ (Христијанските симболи во современата ликовна уметност) во која учествуваат десет македонски уметници. Изложбата беше отворена на 24 октомври во галеријата „Метаноја“.

– Преку ранохристијанските базилики, мермерните иконостаси, симболизмот во мозаиците и релјефите, глинените икони од Виница, средновековното црковно сликарство кое блеска низ вековите со својата неповторлива убавина, иконите од Охридската и Пелагониска школа, дрворезите од барокниот преродбенски период, низ постимпресионистичките дела на основоположниците на предвоеното модерно македонско сликарство, преку опусот на Кондовски и Владимир Георгиевски, иако поретко, христијанските одблесоци се сè уште присутни во делата на современите македонски ликовни творци. Со оваа изложба сакаме да ги потенцираме токму тие ретки одблесоци – истакнуваат од „Транзен“.

Учесници на изложбата се Томе Мишев, Новица Трајковски, Трајче Чатмов, Андреј Митевски, Синиша Новески, Тони Попов, Милош Милосавлевиќ, Никола Пијанманов, Владимир Илиевски и Стефан Младеновски. Рецензент на изложбата е д-р Коста Милков.

Жирито за наградата „Владимир Георгиевски – Златен лист“ во состав Сергеј Андреевски, д-р Коста Милков и Фросина Георгиевска, наградата ја додели на делото „Белиот ангел“ од Милош Милосавлевиќ.

Покрај традиционалната награда „Златен лист“, фамилијата Георгиевски на уметникот му додели слика од ликовниот опус на професорот Владимир Георгиевски.

Изложбата е дел од годишната програма на Министерството за култура во соработка со семејството Георгиевски и галеријата „Метаноја“ во Скопје.

(Текстот е објавен во „Културен печат“ број 253, во печатеното издание на весникот „Слободен печат“ на 26-27.10.2024)