Градоначалникот на Скопје, Орце Ѓорѓиевски, вчера ги додели признанијата за најдобар пожарникар, полицаец и крводарител на град Скопје за 2025 година, а на ова на социјалните мрежи реагира скопјанката Кристина Цоковска. Таа вели оти не може да поверува дека човекот кој, возејќи пијан ја прегазил со автомобил пред помалку од една година, сега добил признание за најдобар пожарникар.

„Најдобриот пожарникар(Игор Станишев) прогласен од Град Скопје е истиот човек кој што на 11.01.2025 предизвика сообраќајна несреќа во која ме удри со моторно возило, под дејство на алкохол. Не можам да си поверувам во каква држава живееме. Овој текст не е обид да се омаловажи неговата професија, ниту неговите професионални успеси, ако навистина постојат, туку е лична реакција и неверување дека човек кој што треба да спасува човечки животи, истовремено и ги загрозува. Не разбирам дали вредностите што ги носат пожарникарите важат само од 9 до 5? Дали храброста и пожртвуваноста се униформа што се соблекува после смена?“, пишува Цоковска во објавата.

„Бидејќи истиот овој човек свесно, под дејство на алкохол се качил во своето возило и со тоа предизвикал опасност во сообраќајот. Записникот од полиција покажа дека го управувал возилото со 2.1г/кг алкохол во крв и 1.3г/кг алкохол во урина. Ваквиот човек сега си добива признание и ќе биде величан од Град Скопје и јавноста“, додава таа.

Град Скопје додели признанија за најдобар полицаец, пожарникар и крводарител за 2025 година