Украинските војници држеа делови од опколениот град Покровск од средината на ноември, но на некои единици им беше наредено да се повлечат од непрактични позиции надвор од градот изминатата недела, изјави во вторник врховниот командант на Украина, Олександр Сирски.

Ситуацијата околу Покровск, логистички центар практично уништен по месеци руски напади, останува тешка. Русија распореди 156.000 војници околу градот, изјави врховниот командант на украинската војска, јавуваат агенциите.

Напредок од средината на ноември

Сирски, цитиран од јавниот радиодифузен сервис „Суспилне“, рече дека украинските сили постигнале напредок од средината на ноември. Руската војска минатата недела соопшти дека нејзините сили го освоиле Покровск, тврдење што го негираа украинските власти.

„Нашите војници не беа присутни во Покровск оваа есен бидејќи нашите капацитети беа ограничени. Од средината на ноември, како резултат на офанзивните акции, обезбедивме околу 13 квадратни километри“, рече Сирски.

Тој додаде дека Украина „продолжува да го држи северниот дел од градот, приближно до железничката линија“ и дека „контролира околу 54 квадратни километри“ западно од Покровск.

Повлекување од непрактични позиции

„Пред неколку дена, наредив повлекување на нашите трупи од растојание од околу 5-7 километри од Покровск. Ротацијата повеќе не беше можна и непријателот се провлекуваше. Немаше смисла да ги држиме таму повеќе“, рече тој.

Покровск е во центарот на долг, бавен напад на руските сили низ регионот Донецк во источна Украина, при што Москва објавува освојување на нови села неколку пати неделно.

Минатиот месец, Русија соопшти дека нејзините сили го освоиле и во голема мера го уништиле градот Купјанск, што исто така го негираше украинската војска. Во својот профил на Телеграм, Сирски рече дека Русија користи дезинформации за да ја искриви ситуацијата и да претставува дополнителна опасност за неговите трупи „во областите каде што воспоставиле контрола“.