Синот на раперот Лил Џон е пронајден мртов во област во Џорџија каде што претходно беше пријавен за исчезнат. На 6 февруари, полициската управа на Милтон објави соопштение на социјалните мрежи во кое се наведува дека тело за кое се верува дека е на Нејтан Смит, 27-годишниот син на раперот, е пронајдено од езеро, пренесуваат американските медиуми.

Во полициското соопштение се наведува дека откако Смит исчезнал во вторник, 3 февруари, полициските службеници утврдиле дека тој „ја напуштил својата куќа под необични околности“, по што е започната потрага.

Според полициската управа на Милтон, Нејтан истрчал од куќата, а полицијата изјавила дека немал мобилен телефон со себе. Полицијата ги опиша околностите под кои Смит го напуштил имотот како „необични“.

– Откако г-дин Смит не беше пронајден во тој период, тимовите ја проширија потрагата на езеро во паркот Мејфил, во близина на неговиот дом во Милтон. На 6 февруари 2026 година, околу 11:53 часот наутро, нуркачите од противпожарната служба на округот Чероки лоцираа и извадија тело од езерото. Се верува дека станува збор за Натан Смит, во исчекување на официјална потврда од Канцеларијата на судскиот испитувач на округот Фултон – се вели во соопштението.

Според соопштението, „нема индикации за насилна смрт“, но истрагата останува „отворена и активна“.

– Понатамошни детали нема да бидат објавени сè додека судскиот испитувач на округот Фултон не утврди официјална причина и начин на смрт и не ги разгледа сите истражни траги. Нашето најдлабоко сочувство до семејството Смит во ова тешко време. Полициската служба со почит ги замолува заедницата и медиумите да го почитуваат барањето на семејството за приватност додека тие тагуваат и се справуваат со оваа трагедија – се заклучува во соопштението.

Кратко по објавата, Лил Џон даде изјава за „Пипл“ со која ја потврда смртта на својот син.

– Многу сум скршен од трагичната загуба на нашиот син, Нејтан Смит. Неговата мајка и јас сме скршени. Нејтан беше најљубезното човечко суштество што некогаш би го сретнале. Беше исклучително грижлив, внимателен, учтив, страствен и топло срце – ги сакаше своето семејство и пријателите со сето свое срце. Беше неверојатно талентиран млад човек; музички продуцент, уметник и инженер, и дипломиран на „НЈУ“ – изјави тој.

Во продолжението на изјавата се вели: „Го сакавме Нејтан со сето свое срце и сме неизмерно горди на него. Беше сакан и ценет, и наоѓаме утеха во фактот дека во нашите последни заеднички моменти му го кажавме тоа јасно.“