Земјотрес со силина од 6,4 степени го погоди Порторико во доцните утрински часови, додека три часа подоцна следуваше нов потрес од шест степени, по кој во некои подрачја се пријавени големи штети, пренесува „АП“.

Осум луѓе се повредени во гратчето кое се наоѓа во близина на епицентарот на земјотресот. Властите соопштија дека една од главните електрани во земјата прекинала со работа, но се очекува островот да добие струја во текот на денот.

Предупредување за цунами е објавено за Порторико и за американските Девствени Острови по првиот земјотрес, но потоа тоа е повлечено.

Како што пренесуваат медиумите, во потресот е срушена една црква, а официјалните лица предупредуваат дека постои можност повеќе објекти да се оштетени, за што ќе имаат информација откако ќе се вратат во функција телефонските линии.

Гувернерката на Порторико Ванда Васкез потврди дека нема извештаи за загинати лица, но побара затворање на јавните институции и ги повика граѓаните да останат мирни додека не се испитаат оштетувањата на објектите.