Американскиот претседател Доналд Трамп и кинескиот претседател Си Џинпинг се сретнаа во Пекинг по церемонијалното добредојде што Си му го приреди на Трамп пред Големата народна сала. Средбата меѓу двајцата лидери траеше околу два часа, двојно подолго од очекуваното, а денеска Трамп ќе учествува на свечена вечера организирана во негова чест, објавува Би-Би-Си.

Кинескиот лидер најави нова ера во односите со САД, кои треба да бидат дефинирани со конструктивни и стабилни односи. Според соопштението од кинеското Министерство за надворешни работи, двајцата лидери се согласиле да воспостават „конструктивен стратешки стабилен однос“ како нова насока за билатералните односи во следните три години и понатаму.

Претседателот Си Џинпинг повика Кина и САД да бидат „партнери, а не соперници“ пред разговорите, а Трамп го опиша Си како „голем лидер“ и рече дека односите меѓу двете суперсили ќе бидат „подобри од кога било досега“.

„Чест ми е да бидам твој пријател“ – Трамп му порача на Си.

🚨🇨🇳 BREAKING —

“Did You Talk About Taiwan?”

Trump and Xi Ignore Question in Beijing pic.twitter.com/s4sIPMMykx

— Pamphlets (@PamphletsY) May 14, 2026

Кратко по почетокот на разговорите, кинеските државни медиуми објавија изјави од Си во кои тој предупреди за потенцијален „конфликт“ со САД околу Тајван, самоуправна територија на која Кина полага право.

Во својот воведен говор, Си истакна дека оваа година се одбележува 250-годишнината од американската независност и рече дека односите меѓу САД и Кина се важни за глобалната стабилност. Тој рече дека отсекогаш верувал дека заедничките интереси на Кина и САД ќе ги надминат нивните разлики.

Кинескиот лидер предупреди на можен конфликт меѓу двете земји околу Тајван, додека Трамп се држеше до општи фрази и учтиви изјави, наведува агенцијата АП и додава дека ова покажува колку двајцата лидери се оддалечени во поглед на чувствителните прашања, вклучувајќи ја војната во Иран, трговскиот договор и односот на Вашингтон со Тајван. Ова сугерира дека средбите ќе бидат повеќе за помпезност и симболика отколку што може да се очекуваат големи пробиви.

Кинеската официјална новинска агенција Синхуа објави дека Си му рекол на Трамп дека ако не се однесува соодветно кон Тајван, САД и Кина ризикуваат „судири, па дури и конфликти и го ставаат целиот однос во голема опасност“.

Белата куќа сè уште не издаде соопштение за средбата меѓу двајцата лидери.

По средбата со Трамп, Си се сретна со врвни американски бизнис лидери. Трамп предводеше делегација од повеќе од десетина бизнис лидери, меѓу кои и шефот на „Нвидија“, Џенсен Хуанг, Тим Кук од „Епл“ и сопственикот на „Тесла“, Елон Маск, што предизвика надеж дека ќе бидат склучени нови договори.

Милијардери и шефови на технолошки гиганти го придружуваат Трамп во Кина

По билатералната средба, Трамп го придружуваше Си во посета на Храмот на небото, комплекс од 15 век, а вечерта Си ќе биде домаќин на свечена вечера во негова чест.