Штрковите во Орешани сепак не се убиени, загинале од струен удар
Сè уште никој не поднесол пријава во МВР откако пред два дена во селото Орешани беа пронајдени угинати два штрка, кратко ни одговорија од Министерството за случајот од пред два дена кога настрадаа два штрка, што предизвика бурни реакции на социјалните мрежи.
Од Здружението за заштита на животни „Анима мунди“ во изјава за „Слободен печат“ велат дека дури и да нема пријава, МВР е должно по службена должност да постапи и да го најде злосторникот.
– Овој случај го третираме како скандалозно злодело и бараме институциите да постапат ургентно, не е возможно никој да не слушнал и да не видел како се случило убиството на штрковите. Бараме најтемелна истрага но не сме оптимисти дека институции ќе постапат, вели Наташа Кнежевиќ од Анима Мунди.
Сепак, „Слободен печат“ дојде до очевидец кој за нашата редакција раскажа што се случило.
– И оваа година на бандерата во близина на нашата куќа дојдоа пар штркови и изведоа две мали штркчиња. Ги гледавме како ги учат да летаат и како ги хранат. До самата бандера кај што е гнездото има висок напон и еден трансформатор што врши напојување за викенд населбата. Двата штрка беа качени на трансформаторот и се обидуваа да летнат кога удрија во чашките, тогаш изби струја и се направи спој, а штрковите паднаа како покосени. Веднаш истрчавме да видиме што се случи, но за жал видовме дека се мртви. Ова не е првпат да се случи ваква трагедија. Секоја година угинуваат штркови но никој не се осмелува да го премести гнездото бидејќи се верува дека носи несреќа, вели Лидија Димовска од село Орешани, и нагласува дека таа и нејзините соселани се згрозени од информациите дека штрковите биле убиени, посебно затоа што, како што вели со тие птици се гордеат сите жители на селото.