Летовите од Москва до други држави во Европа се распродадени во услови кога членовите на паравоената група „Вагнер“ се приближуваат кон главниот град на Русија, пишува „Шпигел“.

Според германскиот весник, билетите за директните линии од Москва до Тбилиси, Астана и Истанбул веќе не се достапни.

Во исто време, мапите на Гугл покажуваат дека автопатот М4, јужно од Москва, по кој патуваат бунтовниците на Вагнер, е затворен.

Во меѓувреме новоизбраниот претседател на Летонија Едгарс Ринкевичс денеска изјави дека неговата земја ја зајакнала безбедноста на своите граници, соочени со тековниот бунт во Русија, и дека повеќе нема да им дозволува на Русите да влезат на нејзина територија.

„Летонија внимателно го следи развојот на ситуацијата во Русија. Безбедноста на границата е зајакната“, објави тој на Твитер и додаде дека издавањето визи и влезот на Русите кои ја напуштаат Русија поради акуелните настани, се суспендирани.