Легендарниот актер Ванчо Петрушевски почина на 67 години, на 25 август 2018 година. Актерот загина од струен удар во неговата викендичка во Орешани, близу Драчево.

Ванчо Петрушевски е роден на 19 април 1951 година во Скопје. Завршил Висока музичка школа, отсек за актерски кадри во Скопје, а во 1975 година се вработил во Драмскиот театар во Скопје.

Првата улога ја играл во „Ослободување на Скопје“ од Душан Јовановиќ.

Во матичниот Драмски театар се пензионираше во 2016 година, но беше активен на сцената и последниве години. Меѓу неговите последни улоги е во претставата „Буре барут“ во режија на Сашо Миленковски.

Петрушевски е познат по улогите во голем број на ТВ- емисии, радиодрами, филмови, претстави, какo: „Македонски народни приказни“, „Хихирику“, „Ангели на отпад“, „Трст виа Скопје“, „Среќна Нова ‘ 49“, „Трето доба“, „Диво месо“, „Грев или Шприцер“, „Солунски патрдии“, „Опстанок“, „Пресуда“.

Во 2016 година ја доби Државната награда „11 Октомври“ за остварување во областа на уметноста и културата.